بهروز میرزایی شیرمرد
تماس با من
پروفايل من
نويسنده (هاي) وبلاگ بهروز میرزایی شیرمرد
آرشيو وبلاگ
      وبلاگ رسمی بهروز میرزایی شیرمرد (روزنامه نگار مستقل)
اوستاد کریمی مراغه ای دن بیر طنز شعر نويسنده: بهروز میرزایی شیرمرد - شنبه ۳۱ تیر ۱۳٩۱

رمضان گلدی

رمضان گلدی جماعت گینه سلمان اولاجاق

دین اسلام اوجالوب خلق مسلمان اولاجاق

گله جاق غیرته فاسق اولاجاق اهل تمیز

ائتدیقی معصیته جمله پشیمان اولاجاق

بزنوب خار مغیلان گیره جاق گل دونونا

نخل سنجد دوزه لوب سرو خرامان اولاجاق

مسجدون تاخجاسی حسرت قالاجاق مهر اوزونه

هره بیر مهر تاپوپ بنده ی یزدان اولاجاق

بیر محرمده چیخوب شاهقلی بیگ مسجددن

بیرده بو آیدا گلوب داخل ایوان اولاجاق

اون بیر آییدور یومویوبدور گ...یار قلی بیگ

ایمدی حمامه گئدوب شاد و خرامان اولاجاق.......



قولاقین دورد ائلیوب ماللیا آغزین آچاجاق

باشینی سیلکه لیوب واله و حیران اولاجاق

آلاجاق منبرین اطرافینی پولسوز لوطیلار

پوللولار گلسه ده بیر گوشه ده پنهان اولاجاق

هر کیمین خوش سسی وار دامدا مناجات ائده جاق

آچیلوب حنجره سی بلبل خوشخوان اولاجاق

بی طهارت بالالار که دانیشانمور سؤزونی

اولاجاق خلقه مؤذن عجب عنوان اولاجاق

ه اوچ ائودن بیری لازیمدی چیخوب وئرسین اذان

بختی قارا خروسین قیمتی ارزان اولاجاق

آی قوتولجاق باتاجاق جمله نفسلر هاموسی

نه اذانچی نه مناجتچی نه قرآن اولاجاق

اوروجون میل ائلینلر گئده جاقلار سفره

گزه جاق هر یانی زوار خراسان اولاجاق

قوتولور ماه مبارک عمودان گلدی خبر

بیست هفتم گئجه سی وارد تهران اولاجاق

او آداملار که وئرولر تومنی بیر قرانا

سره لرده گئجه لر قاری قرآن اولاجاق

چکه جاق رشوه پولینان پلوی  دوری لره

آتاسین یاده سالوب مایل احسان اولاجاق

بش قرانلوق اته قادر دگی بیچاره کاسب

یدیگی سوزمه قاتق ایچدیگی آیران اولاجاق

ترک عادت ائده جک مشدینون اخلاقین عوض

خشگه بیر مطلبه احوالی پریشان اولاجاق

خرمگس تک گلنه نیش ویروب اینجیده جاق

گله جک تنگه دیلیندن هامی ترسان اولاجاق

دولاجاق مسجد و محراب جماعت سوری تک

الده تسبیح هامی عابد دوران اولاجاق

بینوا واعظ شهرین بوغازی یرتیلاجاق

مجلس موعظه ازبسکه فراوان اولاجاق

قره کوللوک۱ قوتولوب جان باسا جان باشقاپانا۲

نفسی تنگه دوشوب خسته و نالان اولاجاق

قویاجاقدور هره بیر شیشه ی کوچک جیبینه

بش قران عطره وئریب دسته ی حیران اولاجاق

باتیروب ملچینی هر دم چکه جاق بیغلارینا

بیر حنا خونچاسینا قویمالی گلدان اولاجاق

بعضی افطارین آچوب جان باساجاق قهوه لره

باشی نقله قیزیشوب تا که اوباشدان اولاجاق

کبلائی توبه ائدوبور یاغا پی قاتمیاجاق

مشهدی ایلدیگی ظلمه پشیمان اولاجاق

هر کس اوز بد عملیندن ائدجک استغفار

نور ایمانیله هر قلب چراغان اولاجاق

اتحادیله علی نوکری زهرا کنیزی

گله جاق مسجده یر کثرت و طغیان اولاجاق

گله جاق دسته به دسته باجیلار موعیظیه

مسجدین هر طرفی روضه ی رضوان اولاجاق

کودری چادرا باشیندا مانیکور باشماقیلان

فر قویوب تللرینه فتنه ی دوران اولاجاق

گزه جاق کوچه لری هاردا گوراخ مرثیه وار

سوخولوب هر ائوه هر سمته شتابان اولاجاق

بعضی قیزلار که نه الله نه پیمبر تانییوب

آیری یرلرده گزوب مرثیه عنوان اولاجاق

آنالار هر بیری بیر دونبک آلوب قولتوقونا

ونگه ونگیله گلوب اوردا نوا خوان اولاجاق

ایشییوب کورپه اوشاقلار باتاجاخ فرش حصیر

گله جاق تنگه ملکلرده گربزان اولاجاق

چکه جاقلار آرادان پرده که عورت کیشنون

آراسیندا او همان پرده نگهبان اولاجاق

او طرفده کیشیلر باشه ووروب آغلیاجاق

بو طرفده باجیلار گل کیمی خندان اولاجاق

سالاجاقدور اله ملت هره بیر کهنه بیاض

ظاهرا بنده ی پاکیزه ی سبحان اولاجاق

ائله که چیخدی اوروجلوق گئده جاق اوز ایشینه

گینه اولکی کیمی مرشد شیطان اولاجاق

ییه جاق مال یتیمی آچاجاق ظلم الینی

قیزادوب صورتینی مثل بادمجان اولاجاق

پاکدور حسابی داداشون غم یمه سین

ائله یومجاق گوزینی داخل رضوان اولاجاق

قورخ او گوندن کسه آمالوی مقراض اجل

سینون اوسته ملک الموت نمایان اولاجاق

یار و یولداش قویاجاق تک داشین آلتیندا سنی

قبر ایچینده بدنون خاکیله یکسان اولاجاق

عدل مستنطقی سندن آلاجاق توضیحات

حی و قهار ائلین عدلیله دیوان اولاجاق

یدیگون نفع ربالر گله جاق بورنوندان

لیره لر هر بیری آتش سوزان اولاجاق

ییغدیقون ثروتی تقسیم ائده جکدور ورثه

خانمون اوزگییه همخوابه ی جانان اولاجاق

هئچ گناه اولماسا بسدور بیزه بو صوم و صلوِِِة

بو عبادت دولانوب بیزلره عصیان اولاجاق

وای او شخصه که کتابین وئرلر صول الینه

باخوب اوز نامه ی اعمالینه گریان اولاجاق

خوش او اشخاصلرین حالینه یوم العرصات

که شفاعتچی لری شاه شهیدان اولاجاق

نقدر ساغدی «کریمی » یازاجاق شعر و غزل

سؤزی هر عصریده هر شهریده هعلان اولاجاق

داخی بوندان بویانا شعر دوشر قیمتدن

هر یریندن دوران عالمده غزلخوان اولاجاق

هر الف بی اوخویان شاعر اولوب بانلایاجاق

هامی دیوانه اولوب صاحب دیوان اولاجاق

بار الها بیزه سن لطف ائله توفیق عمل

اولماسا خالص عمل درده نه درمان اولاجاق

یتیش امدادیمیزه جان یتیشنده دوداقا

اوندا که جان قفس تن ده هراسان اولاجاق

---------------------------------------------

۱-نام مسجدی در مراغه

۲- نام مسجدی در مراغه

منبع وبسایت عباس حسین پور

  نظرات ()
مطالب اخير بار رکود بر دوش نمایندگان مجلس دهم نیروی هوایی ارتش جمهوری اسلامی ایران استخدام می نماید برخورد سلبی درجمع آوری عرضه قلیان‌ها کارساز نیست استیضاح هیچ وزیری در فراکسیون امید منتفی نیست جوابیه معاون فرماندار تکاب به یک مطلب نمی‌توان با هدف بی‌خبر ماندن مردم، به سانسور روی آورد فرماندار با عباسی چه می کند...؟ سلامی دوباره.... واکنش دکتر هاشمی به شایعات الحاق دانشگاه آزاد تکاب به میاندوآب، تضعیف جایگاه تکاب و تشدید وابستگی
دوستان من دل نوشته های من (سنبله برنجی) وبلاگ شخصی عباس حسین پور شورای اسلامی تخت سلیمان وبلاگ طرفداران سلیمی نیا پایگاه خبری وتحلیلی مفید پایگاه اطلاع رسانی شیز تکاب شهر گمشده ارومیه مجله ی انگلیسی تکاب هیات کوهنوردی تکاب رضا دشتی برنجه rohollahmirzaee شورای شهر تکاب اعتدال نیوز-تکاب English Center بانك كتاب ميلاد فرمانداری تکاب شهاب کامپیوتر طبیعت تکاب یاشار گوهری آبشار قینرجه برتر از گوهر ترنج خاتون ارومیه نیوز تکاب آیسان تکاب اخگر فاش آنلاین آوای تکاب عصر ایران کرد پرس تخت نیوز باران امید آینانیوز تابناک ورزش ايراني پرتال زيگور طراح قالب